2019 წელს Facebook-ის მოგება 27 %-ით გაიზარდა და 70,7 მილიარდი დოლარი შეადგინა. ამის შესახებ „The Wall Street Journal“ კომპანიის კვარტალურ ანგარიშზე დაყრდნობით წერს.
გამოცემის ინფორმაციით, Facebook-ის სუფთა მოგება 7 %-ით გაიზარდა და 7,3 მილიარდი დოლარი შეადგინა. ამასთან, მეოთხე კვარტალში კომპანიის ხარჯები 34%-ით, $12 მილიარდამდე გაიზარდა. Facebook-ის აქციები კი 55 %-ით გაიზარდა და თითოს ღირებულება 220 დოლარს შეადგენს.
ცნობილია Facebook-ის მომხმარებელთა ახალი სტატისტიკაც. ყოველდღიურად სოციალური ქსელით 1,66 მილიარდი ადამიანი სარგებლობს, თვეში კი მათი რაოდენობა 2,5 მილიარდს აღწევს. ასევე, ყოველთვიურად კომპანიის აპლიკაციებით - Instagram, Messenger და WhatsApp 2,89 მილიარდი ადამიანი სარგებლობს.
„Forbes USA“-ის ინფორმაციით, კვარტალური ანგარიშის გამოქვეყნების შემდეგ Facebook-ის აქციების ფასი თითქმის 7 %-ით დაეცა, სოციალური ქსელის დამფუძნებლის მარკ ცუკერბერგის ქონება კი 5 მილიარდით, 77 მილიარდამდე შემცირდა.
2019 წელს Facebook არაერთხელ აღმოჩნდა მილიონობით მომხმარებლის მონაცემების გაჟონვის პრობლემის პირისპირ. ივლისში აშშ-ის ფედერალურმა სავაჭრო კომისიამ Facebook მომხმარებელთა მონაცემების გაჟონვის გამო 5 მილიონი დოლარით დააჯარიმა. გამოძიება სოცქსელის წინააღმდეგ კომპანია „Cambridge Analytica“-სთან დაკავშირებული სკანდალის შემდეგ დაიწყო, რომელმაც, მილიონობით მომხმარებლის პირადი მონაცემები პოლიტიკური რეკლამისთვის შეაგროვა.