„აშშ ელოდება, რომ უნგრეთი დაამტკიცებს შვედეთის NATO-ში გაწევრიანებას მომდევნო კვირებში“, – ამის შესახებ აშშ-ის სახელმწიფო მდივანმა, ენტონი ბლინკენმა განაცხადა.

„შვედეთს აქვს უზარმაზარი შესაძლებლობები ალიანსის ყველა სფეროში. გასული კვირის ბოლოს თურქეთმა დაამტკიცა შვედეთის გაწევრიანება NATO-ში. უნგრეთს ახლა მოუწევს მოქმედება, რათა დაასრულოს პროცესი, შვედეთის გაწევრიანება. მე ველოდები, რომ ეს მოხდება მომდევნო კვირებში, როდესაც უნგრეთის პარლამენტი მუშაობას დაუბრუნდება“, – განაცხადა ბლინკენმა.

აშშ-ის სახელმწიფო მდივანმა აღნიშნა, რომ NATO-ს კარი ყოველთვის ღია იყო და რჩება ღია სხვა ქვეყნებისთვის, მათ შორის უკრაინისთვის.

„ვფიქრობ, პროცესი, რომელიც ჩვენ რეალურად ვნახეთ რეკორდულ დროში, ჯერ ფინეთთან და ახლა შვედეთთან, აჩვენებს, რომ NATO-ს კარი ღია იყო და ღია რჩება, მათ შორის უკრაინისთვის, რომელიც გახდება NATO-ს წევრი. ეს ასევე ხაზს უსვამს ერთ-ერთ გზას, რომლითაც ნათლად ჩანს, რომ პუტინის აგრესია უკრაინის წინააღმდეგ რუსეთის საშინელი სტრატეგიული მარცხია. ამან, ფაქტობრივად, დააჩქარა სწორედ ის, რის პრევენციასაც პუტინი ცდილობდა. მას სურდა NATO-ს დაპატარავება და ახლა ის უფრო დიდია და კიდევ უფრო დიდი ხდება. მას სურდა NATO-ს დასუსტება. ის უფრო ძლიერია, ვიდრე ოდესმე ყოფილა. ეს ყველაფერი, ვფიქრობ, მივა მნიშვნელოვანი გადახრის წერტილამდე, როდესაც მივიღებთ NATO-ს სამიტს, NATO-ს ისტორიულ სამიტს. ჩვენთვის დიდი პატივია ივლისში, ვაშინგტონში მასპინძლობა. ვფიქრობ, ეს იქნება ყველაზე ამბიციური სამიტი „ცივი ომის“ დასრულების შემდეგ, რომელიც აჩვენებს NATO-ს ადაპტაციას ახალ გამოწვევებსა და ახალ საფრთხეებთან, იქნება ეს რუსეთი, იქნება ეს ტერორიზმი თუ სხვა რამ. ის, რასაც თქვენ ხედავთ, არის ალიანსი, რომელიც, როგორც ვთქვი, იკრიბება ახალი გზებით და უფრო ძლიერი გზებით, რათა დარწმუნდეს, რომ მას შეუძლია, ეფექტიანად გაუმკლავდეს ამ გამოწვევებს“, – განაცხადა ბლინკენმა.