თურქეთის ეროვნული დაზვერვის ხელმძღვანელი იბრაჰიმ კალინი კატარის ქალაქ დოჰაში ტერორისტული ჯგუფის ჰამასის პოლიტბიუროს ხელმძღვანელს ისმაილ ჰანიეს შეხვდა.ამის შესახებ თურქეთის სახელმწიფო ტელერადიოკომპანია TRT იტყობინება.

ჟურნალისტების თქმით, მათ განიხილეს ღაზაში ცეცხლის შეწყვეტის პერსპექტივები, ისრაელსა და „ჰამასს“ შორის ტყვეთა შესაძლო გაცვლა და ასევე ჰუმანიტარული დახმარების საკითხები.

„მხარეებმა ასევე ხაზგასმით აღნიშნეს, რომ დამოუკიდებელი პალესტინის სახელმწიფოს შექმნა რეგიონში სტაბილურობის საფუძველია“, - აღნიშნავს TRT.

მანამდე კი, აშშ-ის ეროვნული უსაფრთხოების მრჩეველმა ჯეიკ სალივანმა განაცხადა, რომ ჰუმანიტარული საკითხები ღაზას სექტორში აშშ-ს სახელმწიფო მდივნის ანტონი ბლინკენის მთავარი პრიორიტეტი იქნება მომავალ კვირაში ახლო აღმოსავლეთში მისი ვიზიტის დროს.

ამავდროულად, მედია იტყობინება, რომ აშშ-ის პრეზიდენტის ჯო ბაიდენის ადმინისტრაცია განიხილავს ისრაელისთვის იარაღის მიწოდების შენელების ან შეჩერების საკითხს.