რიკოთის საუღელტეხილო გზის, უბისა-შორაპანის მონაკვეთის მშენებლობისთვის გამოცხადებულ საერთაშორისო ტენდერზე, დაინტერესებული კომპანიების მიერ წარმოდგენილი წინადადებები გაიხსნა.

სატენდერო წინადადება სულ 8 კომპანიამ წარმოადგინა. შემდეგ ეტაპზე, შემოთავაზებული წინადადებების განხილვა მოხდება და დონორ ორგანიზაციასთან კონსულტაციით გამარჯვებული კომპანია გამოვლინდება.

უბისა-შორაპანის მონაკვეთზე დაგეგმილია ცემენტ-ბეტონის 4 ზოლიანი 13 კმ-იანი გზის, 27 ხიდის და 18 გვირაბის მშენებლობა. სამშენებლო სამუშაოებს ევროპის საინვესტიციო ბანკი აფინანსებს.

რიკოთის საუღელტეხილო მონაკვეთი E60 აღმოსავლეთ-დასავლეთის ავტომაგისტრალის ერთერთი ყველაზე მნიშვნელოვანი ნაწილია. აღმოსავლეთ-დასავლეთის ავტომაგისტრალის განვითარება კი, ქვეყნის სივრცითი მოწყობის ფარგლებში დაგეგმილი მასშტაბური ინფრასტრუქტურული პროექტების უმსხვილეს კომპონენტს წარმოადგენს.

მაგისტრალური გზების მოდერნიზაციის პროგრამის ძირითადი მიზანია, E60-E70 აღმოსავლეთ-დასავლეთის ავტომაგისტრალის გაუმჯობესება, გაზრდილი სატრანზიტო გადაზიდვებისათვის, შესაბამისი საგზაო ინფრასტრუქტურის შექმნა, რასაც მთლიან შიდა პროდუქტში მნიშვნელოვანი და მზარდი წილი შეაქვს. განვითარდება ეკონომიკა და გაუმჯობესდება თითოეული მოქალაქის ეკონომიკური მდგომარეობა.

რიკოთის უღელტეხილზე, საერთო ჯამში დაგეგმილია 51.6 კმ-მდე სიგრძის გზის მშენებლობა, რომელიც 96 ხიდსა და 53 გვირაბს მოიცავს. რიკოთის მოდერნიზებამ ხელი უნდა შეუწყოს ჩქაროსნული გზის გამტარუნარიანობისა და სატრანზიტო ტვირთბრუნვის ზრდას, ასევე ავტოტრანსპორტის მოძრაობის უსაფრთხოების დონის ამაღლებას და მგზავრობის დროის შემცირებას.

https://m2b.ge/post/220124-ubisa-sorapanis-13-kilometrian-monakvetze-27-xidi-da-18-gvirabi-asendeba 

წყარო :