„სამეფო კარის თამაშების“ ავტორმა, ჯორჯ მარტინმა განაცხადა, რომ მის ნაწარმოებზე დაფუძნებული სერიალის „დრაკონის სახლი“ პირველი სეზონის გადაღებები დასრულებულია. ამის შესახებ მწერალმა თავის ბლოგში დაწერა.

მარტინის თქმით, HBO-მ სეზონის ათივე ეპიზოდი უკვე გადაიღო.

„რამდენიმე სერია უკვე ვნახე და აღფრთოვანებული ვარ. რა თქმა უნდა, წინ ბევრი სამუშაოა. სცენარი, რეჟისურა, მსახიობების თამაში - ყველაფერი არაჩვეულებრივია. იმედია, თქვენც ისევე მოგეწონებათ, როგორც მე“, - წერს მარტინი.

სერიალი გამოგონილ სამყაროში - ვესტეროსში ტარგარიენების სამეფო დინასტიის წევრებს შორის სამოქალაქო ომზე მოგვითხრობს, რომელიც „დრაკონების ცეკვის“ სახელით არის ცნობილი. მოვლენები „სამეფო კარის თამაშების“ სიუჟეტამდე 200 წლით ადრე ვითარდება.

მთავარ როლებს სერიალში ასრულებენ: პედი კონსიდაინი, მეტ სმიტი, ემა დარსი და ა.შ. სიუჟტი ჯორჯ მარტინის რომანზე „ცეცხლი და სისხლი“ არის დაფუძნებული. „დრაკონის სახლის“ პრემიერა 2022 წელს შედგება. პირველ სეზონში 10 ეპიზოდი იქნება.