„შავი ზღვის წყალქვეშა კაბელი ძალიან მნიშვნელოვანი პროექტია არამარტო საქართველოსთვის, არამედ ევროკავშირისთვისაც. ეს არის ურთიერთსასარგებლო, ურთიერთხელსაყრელი პროექტი და შესაბამისად, ჩვენ ძალიან მჭიდრო მოკავშირეები და პარტნიორები ვართ ამ პროექტის განხორციელების კუთხით“,  - განაცხადა საქართველოს ვიცე-პრემიერმა ლევან დავითაშვილმა დღეს ენერგეტიკის საკითხებში ევროკომისარ კადრი სიმსონთან შეხვედრის შემდეგ ერთობლივ პრეს-კონფერენციაზე.

შავი ზღვის წყალქვეშა კაბელის პროექტი დღეს თბილისში ვიცე-პრემიერ ლევან დავითაშვილსა და  ევროკომისარ კადრი სიმსონს შორის მაღალი დონის ენერგეტიკული დიალოგის ფორმატში გამართული პირველი შეხვედრის ერთ-ერთი მთავარი თემა იყო. როგორც შეხვედრაზე აღინიშნა, ეს პროექტი არის დამატებითი ენერგოუსაფრთხოება ევროპისთვის და, რა თქმა უნდა, ძალიან დიდი შესაძლებლობები საქართველოსთვის, ქართული ენერგოსისტემისთვის.

„ეს არის ფლანგმანი პროექტი, რომელიც საქართველოს  პირდაპირ, ფიზიკურად დააკავშირებს ევროკავშირთან შავი ზღვის წყალქვეშა კაბელის მეშვეობით. ის მოგვცემს საშუალებას, რომ არა მხოლოდ ინსტიტუციურად ვიყოთ მზად, გვქონდეს წვდომა ევროპულ ენერგეტიკულ ბაზარზე, არამედ ფიზიკური წვდომის პირობებში, გვქონდეს ურთიერთმიმოცვლა და საქართველოში წარმოებული ენერგიის ექსპორტი მოხდეს“, - აღნიშნა ეკონომიკის მინისტრმა.

ამასთან, როგორც დღეს პრესკონფერენციაზე აღნიშნა, ეს არის ძალიან დიდი სტიმული ინვესტორებისთვის, რომ საქართველოს განახლებად ენერგიებში მოხდეს ინვესტირება - რადგან საქართველოს საშუალება ეძლევა, პირდაპირ დაუკავშირდეს მაღალი მსყიდველობითი უნარის, უფრო პროგნოზირებად, სამართლიან ევროპულ ენერგეტიკულ ბაზარს.