„არავინ გაბედოს საუბარი, რომ სააკაშვილის რომელიმე უფლება დარღვეულია, პირიქით - ზედმიწევნით დაცულია", - ამის შესახებ იუსტიციის მინისტრმა გადაცემა „იმედი LIVE“-ში განაცხადა. რატი ბრეგაძემ აღნიშნა, რომ სააკაშვილის საპატიმროში შეყვანის დღიდან დაიწყო ზრუნვა როგორც მისი ჯანმრთელობის, ასევე უფლებრივ მდგომარეობაზე.

„პირველივე დღეებში მოვუწოდეთ სახალხო დამცველს, პარლამენტში შესაბამისი კომიტეტების თავმჯდომარეებს, ასევე ჯანდაცვის მინისტრს, რომ შემოსულიყვნენ, შეგვექმნა ერთგვარი არაფორმალური ჯგუფი, რომელიც იმუშავებდა სააკაშვილის უფლებრივ მდგომარეობის მონიტორინგზე. გვაქვს ერთმანეთთან ინფორმაციის მუდმივ რეჟიმში გაცვლა, რაც არის უპრეცედენტო და მსგავსი შემთხვევა არა თუ ქართული სასჯელაღსრულების სისტემას, შეიძლება მსოფლიო მასშტაბითაც არ ახსოვდეს.

ჩვენივე ინიციატივით შეიქმნა ექიმების კონსილიუმი. ჩვენ დასამალი არაფერი გვაქვს. მას ძალიან ბევრი ვიზიტორი ჰყავს, ყველას ვუშვებთ, რომ ნახონ ის რა პირობებშია. ჩვენ რომ მწამებლები ვიყოთ, ჩვენ რომ გვინდოდეს მისი უფლებების რამე ფორმით შეზღუდვა, შევუშვებდით ამდენ ხალხს მის სანახავად?! პრევენციისთვის, ციხის ეზოში მუდმივ რეჟიმში მორიგეობს რეანიმობილი და მისი საკნის გადაღმა მორიგეობს ორი ექიმი. ასევე შეტანილია სპეციალური აპარატურა, რომ თუკი რაიმე პრობლემა შეექმნება მის ჯანმრთელობას, ადგილზეც კი აღმოვუჩინოთ დახმარება“, - განაცხადა რატი ბრეგაძემ.

მიხეილ სააკაშვილმა მკურნალობზე კვლავ უარი განაცხადა.

საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს.პატიმრობაში მყოფმა სააკაშვილმა შიმშილობა გამოაცხადა, მხარდამჭერები კი ყოფილი პრეზიდენტის გათავისუფლებას ითხოვენ. სააკაშვილის ადვოკატები და სახალხო დამცველი ყოფილი პრეზიდენტის სამოქალაქო საავადმყოფოში გადაყვანას ითხოვენ, იუსტიციის სამინისტრო კი აცხადებს, რომ #18 სასჯელაღსრულების (სამკურნალო) დაწესებულებაში სააკაშვილის მკურნალობისთვის ყველა აუცილებელი პირობა არსებობს.

წყარო :