ახლახან ხათუნა ჟორდანიამ სიმსივნე დაამარცხა. მოულოდნელი დიაგნოზი მძიმე შესაგუებელი აღმოჩნდა ყველასთვის, თუმცა, ხათუნას გვერდით უამრავი ადამიანი დაუდგა და სამწლიანი ბრძოლის შემდეგ სასურველი შედეგიც დადგა. ამის შესახებ ჟურნალ „თბილისელებთან“ ინტერვიუში მომღერალი ნინი ქარსელაძე საუბრობს.

„ვინც ამ დაავადებას შეჯახებია, ყველა ელოდება მომენტს, როცა მასზე გამარჯვების შეგრძნებას გამოცდის – ჩვენ ამას სამი წელი ველოდით და ეს დღეც დადგა, მაგრამ სიმართლე გითხრათ, ეს ის სიხარული არ იყო, რომელიც უნდა ყოფილიყო. ხათუნას ჯანმრთელობის მდგომარეობის შემოწმებამდე სულ ცოტა ხნით ადრე ჩემი დეიდაშვილი დაიღუპა ავარიაში. ამ ტრაგედიის გამო, ძალიან დაძაბულები და განადგურებულები ვიყავით, მაგრამ კიდევ ერთხელ მივხვდი, რომ ჩვენ მხოლოდ სიყვარული გადაგვარჩენს. უნდა გენახათ, დეიდაჩემი როგორ ელოდა გამოკვლევებიდან ხათუნას დაბრუნებას. უნდა გენახათ, როგორი იყო მათი შეხვედრა. ამ წლების განმავლობაში, ისიც ისე ელოდა ხოლმე ხათუნას პასუხებს და ისიც ისე იყო ხათუნას ანალიზების კონტროლში ჩართული, როგორც მე და განკურნებული ხათუნას დაბრუნების შემდეგ მათი პირველი შეხვედრით გამოწვეული ემოციები ჩემი მეხსიერებიდან არასდროს წაიშლება. დედაც ტიროდა და დეიდაც – ქალი, რომელმაც ერთადერთი შვილი დაკარგა, ყველა ძალიან დიდ განცდებში ვიყავით. ის და დედაჩემის სხვა მეგობრები საოცრად დაგვიდგნენ გვერდით, ჩვენ ერთი დიდი ოჯახი ვართ. რამდენად მტკივნეულიც იყო ხათუნას ამბები, იმდენი კარგიც დავინახე, რომ დედაჩემს ჰყავს მეგობრები, რომლებიც ჩემი დეიდები არიან და მათ გარეშე მე ამ გზას ვერ გავივლიდი. რა თქმა უნდა, ჩემს ოჯახთან ერთად, მათზე არც ვსაუბრობ. რამდენიმე მათგანს ნერვიულობის ნიადაგზე შაქარიც დავმართე. თქვენი ჟურნალის მეშვეობით მათ ბოდიშს მოვუხდი და მადლობას ვეტყვი ყველა წამისთვის და გვერდში დგომისთვის. მთელი ცხოვრება ვილოცებ იმისთვის, რომ უფალმა მათ თავისნაირი ადამიანები არ მოაკლოთ“, - ამბობს მომღერალი.

წყარო :